MANEX ERDOZAINTZI

ITXURAK

          1

        Erreka doha

        Ibarrean behera

        Bere inguru-itzuliekin

        Etxe guzien parrean edo

        Ondoan

        Erreka doha

        Zuhaitzen artetik

        Zuhaitzek zaindua

        Erreka doha

        Ibarrean

        Behera...

 

Miraila mugikorra

Behera dohan errekatik

Datorkit

Ene aurpegi itxura

Ur zolaren zolan

Ene begiak

Ene kopeta

Ene ahoa

Ene kokotza

Higitzen dira:

Bizi pilpira bero bat

Sentitzen dut

Gorputz guzian...

 

        Erreka doha

        Ibarrean behera:

        Ur zolaren zolatik

        Ene aurpegi itxura

        Mugikorra

        Pilpiran

        Datorkit!

 

         2

Zazpi Probintziak

Bata besteari lotuak

Zenbat eskualde loretsu

Oztibarre, Amikuze, Otxagabia,

Basaburia, Pettarra, Baztane,

Goiherri, Galdakano,

Garazi...

Zenbat eremu dohaintsu

Beren izenekin

Beren izanarekin

Beren bizi nahiarekin

Bata besteari estekatuak

Bata bestean errotuak

Historia luze batean zehar

Odol beraren bustiaz haziak...

 

        Bila nabilen

        Bila gabiltzan

        Herriaren itxura

        Datorkit

        Datorkigu

        Zazpi Probintzien

        Batasunean!

 

Mendiz-mendi

Ibarrez-ibar

Itsaso hegietatik

Zazpi Probintziak

Bateratz dohaz:

Historia zolaren zolatik

Gure Herri itxura

Mugikorra

Pilpiran

Datorkigu!

 

          3

Gure Herri langile honen

Ukaiak

Kate koropiloak dira

Gure Herri langile honen

Zangoak

Haritz enborrak dira

Burruka luze baten historian

Koropilatuak eta

Enbortuak

Gure Herri langile honen

Ukaiak

Eta

Zangoak

Historikoak dira!

 

                Ukaiotan

             Zangootan

             Bila gabiltzan

             Herritasuna

               Mugikorra

                        Pilpiran

                                 Datorkigu!

<< Olerkien zerrendara itzuli

Gipuzkoa.net
2011 Kultura, Gazteria eta Kirol Departamentua - Gipuzkoako Foru Aldundia
Creative Commons