HIRE SOA DABILAN
Mendiak eta mendiak baino urrunago
hire soa dabilan haraindian
haraindiko zelai berdeen bila
ikerka hire soa dabilan mendien gailurra baino gorago
haraindiko zelai berdeetako loreen artetik
hea nonbait agertuko zaunanez igurikatzen dunana...
Hire soa, kezkati eta aspaldian logale, zelai lilluragarrietan
doan, txoriek kantua galdu duten eremuetan
ebaki diozkatelarik bederazka haritzak eta pagoak...
Mendiak eta mendiak baino urrunago
haraindiko zelai berdeetan
dabilan hire soa, goibel eta ezin aspertua dabilan
gizarte legor honen barruan galdu baitzitzaunan
maite huenaren bihotza
bere etxalde ttipitik kanpo joatera bortxatu zutelarik
lanketa, herrestan, batetik bestera, lanketa
beti behardun eta zordun, umiliatua
lanketa, lanketa, herrestan, batetik bestera
ezinbizian amildua, higatua eta ondikotz
etsitua, ez jakin non, ixildu baitzitzaunan
maite huenaren intziria...
Hire soa beti doan, dabilan, zuhaitz itzalpeetan ikerka
mendiak eta mendiak baino urrunago
uste baitun zelai berdeetako loreen artetik
beharba agertuko zaukanala
maite dunanaren itxura meharra...
Eta beti uste baitun...
hire soa doan, dabilan, gizarte antzutu baten
itzalpeetan kerka, goibel eta ezin aspertua
doan...
1976ko otsailan
